 Быў час, калі "Грунвальдскі фэст” заставаўся для
беларускага грамадства, моладзі адзіным напамінам пра вялікую Перамогу нашых
продкаў над тэўтонцамі. Цяпер, у шасцісот першую гадавіну Грунвальда, можна
кантатаваць, што ў напрамку ўшанавання ваярскага чына беларусаў зроблена не так
ужо і мала: адбылося агульнабеларускае святкаванне 600-гадовага юбілею бітвы, ёсць
першы помнік Героям Грунвальда і яго трыўмфатарам – Вітаўту і Ягайлу, які ўсталяваны сябрамі клуба "Спадчына” ў Стaрых Дарогах, створаны шматлікія літаратурныя
і выяўленчыя творы на гэтую тэматыку, а ў нашых гарадах паступова з’яўляюцца
вуліцы з назвай "Грунвальдская”, як гэта нядаўна адбылося ў Магілёве…
І ўсё ж, "Грунвальдскі фэст” да
гэтага часу застаецца буйнейшай культурніцкай акцыяй, мэта якой – прапаганда
сярод моладзі слаўных старонак айчыннай гісторыі, а таксама музычных твораў
розных напрамкаў, якія ўслаўляюць мужнасць і рыцарскі дух герояў Грунвальда.
Менавіта выкананню гэтай місіі і быў прысвечаны чарговы, трэці па ліку, "Грунвальдскі
фэст-2011”,
удзельнікі якога 15 ліпеня нагадалі слухачам пра знакамітую дату ў беларускай
гісторыі.
Афіша "Грунвальдскага фэста-2011” абяцала ў гэтым годзе
шмат цікавых музычных сутрэч з мінулагоднімі ўдзельнікамі гэтай музычна-гістрычнай
імпрэзы і нават прэзентацыю альбомаў некаторых з іх, так і незабыўныя
выступленні калектываў, якія прадстаўляюць рэгіёны нашай краіны. Гэтыя
акалічнасці і штрухнулі аматараў айчыннага рока да таго, каб у летнюю спёку
прыйсці на адкрытую пляцоўку парка Чалюскінцаў, дзе быў запланаваны канцэрт
"Грунвальдскага фэста-2011”.
Першымі на сцэну былі запрошаны
музыканты мінскага гурта UNIA, якія адзін за адным выканалі некалькі сваіх хітоў, каб
"разагрэць” публіку. Музыканты змаглі надаць "Грунвальдскаму фэсту” святочны
настрой і зрабіць каб канцэрт трошкі пазней ператварыўся ў маладзёжны танцавальны
марафон. Для гэтага музыкі UNIA адыгралі адін за адным некалькі сваіх самых завадных
кампазіцый: "Вясна”, "Ульяна”, "Калядо” і іншыя, якія выклікалі гарачыя апладысменты
слухачоў.
Фестывальную эстафету падхапілі
музыканы гурта Testamentum Terrae, якім кіруе самавіты і
каларытны Юрась Панкевіч. Цікава тое, што нават пры адсутнасці ў афішы
ветэранаў "Грунвальдскага фэста” --
гурта "Стары Ольса”, Testamentum Terrae аднаасобна змог ўзяць на сябе хэдлайнерскія функцыі і
стварыць на фэсце незабыўную атмасферу сярэдневечнага свята, закружыць ахвочых
у танцавальнай віхуры. 
Гэтым разам музыкантам дапамагалі дзяўчыны з
танцавальнага гурта "Гістрыён”, якія пад рытмы і мелодыі "Беларускай полечкі”,
"Гандзюленькі”, "Кракавяка” і "Рыцара вераб’я”, развучвалі старадаўнія па, а
потым і пускаліся ў агульныя скокі разам са сваімі "вучнямі”. Такая ўжо
спецыфіка супольных канцэртаў гуртоў Testamentum Terrae і "Гістрыён”.
Адной з нечаканасцей сёлятняга
"Грунвальдскага фэста” стаў удзел у ім гурта P.L.A.N. і яго лідара рок-барда Андрэя
Плясанава. Чаму нечаканасць? Мо таму, што ў апошні час гэты знаны гурт, адзін з
ветэранаў айчыннай рок-сцэны, не так часта клічуць на такія імпрэзы, хоць у рэпертуары
гурта P.L.A.N. шмат цікавых твораў рок- і
фолк-рок тэматыкі, беларускамоўных кавераў на сусветна вядомыя рок-хіты...
Як толькі на сцэну выйшлі
музыканты P.L.A.N., сярод якіх быў баяніст Анатоль
Стэцэнка, то сярод наведвальнікаў фэста можна было пачуць пытанне: "Што гэта:
рок пад баян?” Але, як паказалі далейшыя падзеі, гэты інструмент у таленаватых
руках толькі дадаваў свежыні аранжыроўкам гурта P.L.A.N., як і іншым удзельнікам
канцэрта, якія ў сваім складзе маюць гэты ўніварсальны інструмент нароўні з
гітарамі і сінтэзатарамі. 
Андрэй Плясанаў разам з сябрамі
нагадалі слухачам колькі песень з розных альбомаў гурта, "грунвальдскую” песню
"Выправа” на верш Я. Малішэўскага. Але найбольшыя апладысменты выпалі на долю
знакамітага хіта P.L.A.N. "Добрай табе раніцы,
Беларусь!”, якую хораша і ўзнёсла заспявалі ўсе ўдзельнікі фестываля. Гэтыя
творы далі падставу слухачам выклікаць кіраўніка гурта Андрэя Плясанава на
"біс” і той зрабіў падарунак слухачам – сола выканаў востра сацыяльны зонг
"Даміно”.
Сярод тых, хто стаяў ля вытокаў
многіх медыявільна-музычных фестываляў і акцый быў і застаецца гурт "Рокаш”.  Гэтым разам у музыкантаў была падвоенная нагода для святкавання – слаўная дата
601-х угодкаў Грунвальда і прэзентацыя іх даўгачаканага альбома "Запалі агонь”.
Таму музыканты гурта "Рокаш” з асаблівым пачуццём у гэты дзень выйшлі на сцэну:
ім было што прапанаваць слухачам. Адзін за адным прагучалі песні "Рокаша” з
новага альбома, якія вельмі спадабаліся тым, хто прыйшоў на "Грунвальдскі
фэст”. Сапраўднай зоркай прэзентацыі стала вакалістка гурта "Рокаш” Паліна
Дулінец, якая дэмантравала цудоўныя вакальныя і артыстычныя здольнасці. Гэта дапамагала
Паліне больш яскрава раскрыць унутраны патэнцыял музычных твораў гурта. Трэба
адзначыць, што гучанне гурта апошнім часам стала больш шчыльным і "цяжкім”, не
у апошнюю чаргу намаганнямі басіста Лявона Казакова. Відавочна, што альбом
"Запалі агонь” стаў для гурта "Рокаш” новай прыступкай для выканаўчага
ўдасканалення і творчага роста. Зноў здзівіў слухачоў і сталічны
гурт "Кашлаты Вох”: гэтым разам было значна менш панкаўстага шоу, затое з
музычнага і выканаўчага боку гурт падаўся больш сталым і разнастайным.  Магчыма,
зараз у музыкантаў адбываецца пераацэнка каштоўнасцяў. Не хацелася каб "Кашлаты
Вох” згубіў тое, за што іх любіць публіка. Але відавочна, што гурту трэба
шукаць шляхі ў будучыню.І яшчэ, трэба падзякаваць музыкам за тое, што
негледзячы на стылістычныя пошукі, "Кашлаты Вох” не адмаўляецца ад беларускай
дуды і ўвесь час выкарыстоўвае ў сваіх канцэртах, адкрывае новыя грані
выканаўчых магчымасцяў гэтага нацыянальнага інструмента ў сучасным музычным
кантэксце.
Для сталічных слухачоў да часу
заставаліся таямніцай імёны іншых удзельнікаў "Грунвальдскага фэста-2011” – гуртоў ROSY са Стоўбцаў і ОМУТ
(Драгічын-Мінск). І вось вядучы запрасіў на сцэну першых гасцей – гурт ROSY, які ўжо вядомы слухачам
па ўдзелу ў хіт-парадзе партала "Тузін гітоў”. А сёння ім выпала магчымасць
прадставіцца сталічным слухачам ў "жывым” гучанні. З першым акордам стала зразумела
– ROSY калектыў вопытны і
творча ўсталяваны. У музыцы каманды можна адчуць уплывы традыцыйнага рок-н-рола
і музыкі кантры. Прынамсі, так падалося слухачам, калі тыя слухалі кампазіцыю
гурта пад назвай "Аршанская” і іншыя творы гурта. Але музыкантам блізкія лірычныя
і баладныя тэмы і мелодыі. Іх выдатна выконваюць вакалісты (адначасова і
гітарысты) гурта Віталь Чарняўскі і Ягор Касцюкоў, дзякуючы якім гучанне гурта набывае
мастацкую завершанасць. 
І ўсё ж, найбольш вольна музыканты сябе пачуваюць у
блюзавай стыхіі. Пра гэта засведчыў жартоўны блюз "Чыкага-Стоўбцы”, які быў віртуозна
выкананы музыкантамі гурта ROSY пад несціхаючыя апладысменты сталічных слухачоў. ROSY зноў засведчылі вялікі
патэнцыял рок-музыкантаў з рэгіёнаў, якіх абавязкова трэба прыцягваць да музычных
фестываляў і канцэртаў, якія праводзяцца ў сталіцы, дапамагаць ім выданні
сольных альбомаў.Яшчэ адно адкрыццё сёлятняга
"Грунвальдскага фэста” – лідары "палесскага метала”, фолк-рок-гурт з Драгічына
ОМУТ. Тут таксама саліруюць два вакалісты: Эльвіра Стэльмашук – уладальніца
магутнага опернага сапрана і штатны "гроўліст” Алесь Максімовіч. Менавіта на
спалучэнні здавался б неспалучаемага: класічнага і рок-вакала ў яго
экстрэмальным выглядзе і базуецца вакальная частка гучання гурта. Да таго ж,
гэтыя музыканты бывае выкарыстоўваюць у сваіх творах такі рэдкі ў нас
еўрапейскі духавы інструмент, як вістл. Калі ён гучаць разам з баянам, то і
"металічныя” рыфы ОМУТа не падаюцца такімі ўжо неарыгінальнымі. Дакладна,
музычныя творы драгічынскіх музыкантаў (гурт быў створаны ў 2009 годзе) былі
ўспрыняты з вялікім энтузіязмам, што не магло не адбіцца на настроі музкантаў.
На адным дыханні яны выканалі фальклорныя песні "Ой, у полі рэчанька”, "Шэры
гусі”, аўтарскія песні ("Спявай, Зямля”), прадставілі слухачам сваю новую
кампазіцыю, якая пакуль не мае назвы.  Сэт гурта ОМУТ стаў цудоўнай кодай усяму
"Грунвальдскаму фэсту-2011”.
Бо ячшэ раз прадэмантраваў слухачам важкі патэнцыял айчынных выканаўцаў, якія,
не гледзячы ні на якія неспрыяльныя ўмовы, зрабілі стаўку на родную беларускую
мову.
Анатоль Мяльгуй Апублікавана:http://novychas.org/culture/%D0%B3%D1%80%D1%83%D0%BD%D0%B2%D0%B0%D0%BB%D1%8C%D0%B4-%D0%B0%D0%B4%D0%BA%D1%80%D1%8B%D0%B2%D0%B0%D0%B5-%D1%82%D0%B0%D0%BB%D0%B5%D0%BD%D1%82%D1%8B
|
