Рамантычна-гераічная віхура нацыянальнага Адраджэння 80-90 гадоў ХХ стагодзьдзя паклікала да актыўнай культурніцкай і палітычнай дзейнасьці маладых таленавітых беларусаў з розных крывіцкіх земляў: вёсак і хутароў, гарадоў і мястэчкаў. Гістарычна, акрамя змаганьня за незалежнасьць краіны, ім было наканавана сцярушыць саўковае лушпінне з таго, што ў той час выдавалася пад шыльдай "нацыянальная культура”. А галоўная задача таго і цяперашняга часу – акрэсліць сапраўды нацыянальны дыскурс і кантэкст культурнай прасторы Бацькаўшчыны, знайсці спосабы яе трывалага існавання ў розных гістарычных варунках. А на пачатку шляху тыя варункі выглядалі даволі цмянымі…