На скрыжаванні музычных шляхоў з Магілёва ў Бярозу  Аматары беларускай рок-музыкі і гурта :B:N: з асаблівым пачуццем
прыйшлі на канцэрт любімай каманды: музыканты з Бярозы не так даўно абвесцілі
пра пачатак працы над новым, трэцім па ліку, альбомам. Гэтая падзея павінна
была адбыцца менавіта пасля гэтага канцэрта, які прысвячаўся дванадцацігоддзю
гурта і выклікаў асаблівую цікаўнасць прыхільнікаў творчасці гурта. Кожны
альбом :B:N: -- своеасаблівы рывок ў іх творчасці, новае слова ў
айчыннай рок-музыцы. Слухачы, якія прыйшлі ў сталічны клуб Re:Publik чакалі новыя песні ад любімага
гурта, назіралі за тым, як змянілася гучанне каманды, задавался пытаннем, якія "фішкі”
падрыхтавалі "бээнаўцы” для свайго музычнага шоў? На ўсе гэтыя пытанні ў вопытных музыкантаў знайшоўся
адказ, бо "жывы” канцэрт – заўсёдны экзамен для таленавітых музыкантаў, якія
смела ідуць на наўпроставы кантакт са слухачамі. А музыканты :B:N: заўсёды адрозніваліся менавіта
гэтымі якасцямі. Цікаўнасць да канцэрта была падвышана і тым, на сцэну клуба
была запрошана яшчэ адна супер-папулярная каманда -- магілеўскі гурт Akute. Тым, хто ў гэты дзень прыйшоў у
вядомы ўжо сталічны клуб пашэнціла: іх чакала сустрэча з двумя таленавітымі
калектывамі, якія прадстаўляюць рэгіянальнае адгалінаванне беларускага рока.
Гэта магілёўскі Akute і гурт :B:N:, які прадстаўляе
Бярозу. У нечым гэтыя каманды падобныя, бо выконваюць энергічны гітарны рок,
хоць магілёўцы граюць трыо, а бярозаўцы – квартэт. Абедзве каманды былі трыумфатарамі
фэста "Басовішча”, :B:N: у 2002 годзе, а іх
магілёўскія сябры -- ў 2010. Аб’ядноўвае музыкантаў і тое, што за аснову сваёй
творчасці яны бяруць жыватворны рок-н-рол, а тэксты іх заўсёды напоўнены
яскравымі пачуццямі, якія імкнуцца раскрыць унутраны свет сучасніка. Да таго ж,
іх яднае агульная прыхільнасць да беларускай мовы ў песнях, што робіць іх творы
ўзорамі нацыянальнай музычнай творчасці маладой генерацыі беларусаў пачатку ХХІ
стагоддзя. 
На канцэрце ў сталічным клубе Re:Publik музыканты
прадставілі свае праграмы, якія адлюстроўвалі сённяшні стан выканаўчага і
кампазіцыйнага майстэрства вядомых выканаўцаў. Зразумела, музыканты Akute прадстаўлялі сталічным
слухачам песні са свайго новага альбома "Дзевачкі і космас”, а вось "бээнаўцы”
нагадалі хіты з папярэдніх кружэлак – "Не тывай” і "Жыве рок-н-рол”. Запіс
наступнага, трэцяга альбома бярозаўскімі музыкантамі быў толькі абвешчаны і
гурт :B:N: праспяваў слухачам дзве
кампазіцыі з чарговага альбома. Гэта песні "Выраю няма” і "Напрыканцы”...
Затое, госці з Магілёва з гурта з
Akute яшчэ раз "выпрабавалі” ў
канцэртных умовах свой новы альбом. Дзякуючы таму, што ўпершыню яго можна было
пачуць і спампаваць з інтэрнэта, слухачы добра ведалі словы песень і актыўна
дапамагалі лідэр-вакалісту і гітрысту Akute Стасю Мытніку. Так, агульным спевам, прагучалі
вядомыя ўжо ў Мінску песні гурта "Машына”, "Свяці”, "Агонь”, "Павольна”,
"Непазбежнасць” і, канешне ж, песня, якая, у нейкай ступені, вызначыла лёс
музыкантаў – "Адзіноцтва”. Прагучала і навінка ад Akute: песня "Іголкі”, якая плануецца
для другога альбома каманды.
У музыцы Akute шмат эксперыментальнага –
незвычайныя сугуччы і гітарныя акорды, нечуваныя раней у айчыннай рок-музыцы
рытмічныя і кампазіцыйныя малюнкі. У той жа час, песні гурта напоўнены
"касмічнай” меланхоліяй і сімвалізмам адзіноты далёкіх зорак, мінорным строем некаторых
кампазіцый.  Гэтая своеасаблівасць музыкі Akute вылучае яе на фоне ўсіх гуртоў,
якія дэкларуюць прыхільнасць да стылістыкі рок-музыкі ХХІ стагоддзя. Akute ад дэкларацый робіць значны
крок да рэалізацыі гэтай мэты: каманда ўспрымаецца як флагман мадэрновых
стылістычных эксперыментаў айчынных музыканатаў. Нездарма магілёўскія музыканты
з вялікай долей самаіроніі ахрысцілі свой гурт "дыска-дэкадансавым”...
Іншая справа – музыка гурта :B:N:, якая бударажыць менавіта
традыцыйным рок-н-рольным драйвам, куплетнай структурай песень, яскравасцю пачуццяў,
якія выяўляюцца музыкай і тэкстамі гурта. Сапраўды, лепшыя кампазіцыі гурта –
"Дажджы”, "Не трывай”, "Жыве рок-н-рол”, "Моднікі”, "Толькі я”, "Крылы”, а
таксама, новыя творы "Будзь сабой!” успрымаюцца слухачамі як малюнкі ці нататкі
з рэальнасці, у якой ім прыходзіцца жыць. З невызначанымі катэгорыямі свабоды,
дэмакратыі і незалежнасці... А вось музычная і гукавая
эвалюцыя гурта :B:N: адбываецца даволі
традыцыйна: ад рок-н-рольных рытмаў у бок "металічных” гітарных рыфаў і хард-рокавага
ансамблевага гуку. Гэтыя змены добра былі заўважны ў каверы на знакамітую
песняроўскую апрацоўку народнай песні "Ружа”, якую на канцэрце музыканты :B:N: прысвяцілі памяці Уладзіміра
Мулявіна. Кавер на "Ружу” вызначаўся акцэнтаваным рытмічным інструментальным малюнкам
ў metal-стылістыцы, а ў выніку
-- незвычайным прачытаннем мулявінскай аранжыроўкі.
Песні з новага, трэцяга па ліку
альбома :B:N: засведчылі, што музыканты
сталеюць і гатовы прапанаваць слухачам не толькі хітовую рок-музыку, але і
заглыбленыя, філасофскага плана кампазіцыі, якія дадуць прыхільнікам творчасці
гурта і беларускай рок-музыкі падставы для больш глыбокага асэнавання з’яў
нашага жыцця, для больш глыбокага разумення сваёй ролі ў грамадстве, у лёсе
краіны.  Да таго ж, новыя творы "Выраю няма” і "Напрыканцы” неяк незаўважна намалявалі
рысы новай працы музыканатаў :B:N: і іх адрозненні ад ад папярэдніх кружэлак. Зрэшты, ці
спраўдзяцца гэтыя прагнозы і спадзяванні слухачаў, пакажа час. Тым больш, што
бярозаўскія музыканты абяцалі новы альбом ужо вясной будучага года.
Анатоль Мяльгуй Апублікавана;http://novychas.org/culture/%D0%BD%D0%B0-%D1%81%D0%BA%D1%80%D1%8B%D0%B6%D0%B0%D0%B2%D0%B0%D0%BD%D0%BD%D1%96-%D0%BC%D1%83%D0%B7%D1%8B%D1%87%D0%BD%D1%8B%D1%85-%D1%88%D0%BB%D1%8F%D1%85%D0%BE%D1%9E-%D0%B7-%D0%BC%D0%B0%D0%B3%D1%96%D0%BB%D1%91%D0%B2%D0%B0-%D1%9E-%D0%B1%D1%8F%D1%80%D0%BE%D0%B7%D1%83
|
