У мінулую сераду адбылася прэзентацыя паэтычнага зборніка
«Габітацыя» аўтарства вядомага беларускага паэта, радыёвядучага і музыканта
гуртоў «Князь Мышкін» і «Нагуаль» Віктара Сямашкі (першы на здымку маёй фота-падборкі). Імпрэза адбылася ў
старадаўнім прамысловым раёне сталіцы па вуліцы Кастрычніцкай, на ганку моднай
кавярні New Ton.
Віктар Сямашка вядомы не толькі як музыка-амправізатар,
але і як аўатр і вядучы праграмм пра беларускую сучасную музыку «Новая зямля»
на Radio Unistar і «Кракатук», якая выходзіць на Radyjo Racyja. Як паэт дэбютаваў ў 1992 годзе. Аўтар паэтычных зборнікаў «Марыя S» (2006) і «ReRa» (2011).
Як падкрэсліў В. Семашка на
прэзентацыі – паэтычны зборнік «Габітацыя» ствараўся на працягу ад кастрычніка
2006 года і да мая 2008. Кніга ўключае паэтычныя цыклы «Габітацыя», «Дафарэнцыя»
і «Гзымс». За гэты час як гранкі кнігі прачыталі і выправілі не толькі выдаўцы
ў асобе галоўнага рэдактара выдавецтва «Галіяфы» Змітра Вішнёва, але і калегі
па творчасці, бард Раман Яраш, паэт Віктар Жыбуль, жанка Вольга Сямашка. Назву
кнізе дала вёска Габітацыя, якая знаходзіцца побач з Будславам. З лаціны habitation перакладецца як «жытло,
пражыванне».
Негледзячы на пагрозлівыя хмаркі
і кроплі дажджу, арганізатары прэзентацыі і яе вядучы – паэт і музыкант Віктар
Сямашка вырашылі не зменяць заяўлены фармат сустрэчы. Распачалася прэзентацыя
на ганку кавярні New Ton з аўтраскага чытання твораў са
зборніка «Габітацыя» пад уласнае музычнае суправаджэнне. Дзеля гэтага Віктар
выкарыстоўваў шэраг ударных і духавых інструментаў, гукі якіх былі апрацаваныя
спецыяльнымі электроннымі прыладамі. Ад гэтага сінтэзу паэтычныя радкі толькі
выйгралі, бо гукі дапамагалі слухачам больш пільна сачыць, удумвацца ў паэтычны
лад і сімвалізм паэзіі Віктара Сямашкі.
Выдавец кнігі вершаў «Габітацыя»
Зміцер Вішнёў падкрэсліў, што паэзію Віктара Сямашкі можна назваць
футурыстычнай, тым не менш яна вельмі арганічна спалучаецца з беларускай
рэчаіснасцю. І ў гэтым бачыцца яе арыгінальнасць на беларускім літаратурным набасхіле.
Музычную частку прэзентацыі
працягнуў бард і калега В. Сямашкі па творчым праектам Раман Яраш. У яго
выкананні прагучала фальклорная «Купальская» песня, а таксама музычная кампазіцыя, створаная на аснове
паэмы Віктара Сямашкі «Пра Менскі метрапалітэн».
У мінулым шмат даводзілася разважаць пра новыя формы
існавання беларускай культуры, асабліва ва ўмовах гарада. Дык вось,
"прэзентацыю на ганку” можна аднесці да такіх культурных інавацый. Недахоп яе –
амаль поўная залежнасць і падпарадкаванне метэаралагічным капразам зменлівага
надвор’я. А вось «разынка» такіх імпрэзаў у тым, што яе ўдзельнікамі можа стаць
не толькі зацікаўлены паэзіяй ці музыкай, але і любы мінак, які ў час
правядзення прэзентацыі шпацыруе па вуліцы.
Так здарылася і пад час прэзентацыі
паэтычнага зборніка «Габітацыя» В. Сямашкі. А што казаць, калі загучалі
танцавальныя мелодыі ў выканнні «Капэлі На Таку», полечкі, кракавякі і
падыспані якіх натхнілі многіх удзельнікаў і слухачоў прэзентацыі, выпадковых
яе наведвальнікаў папрактыкавацца ў аўтэнтычных беларускіх танцах, а таксама
ўпэўніцца, што беларуская Беларусь, негледзячы на татальны ўціск, жыве і
развіваецца ў сучасным рэчышчы…
Анатоль Мяльгуй
|